كيفية نشر منتدى او موقع على الانترنيت ومحركات البحث

[thamer]

اذا كان هناك منتدى مجاني وتريد نشره على الانترنيت بدون انتظار فما هي الطريقة ؟؟
واذا كنت تريد انشاء منتدى جديد وتريد مباشرة وضعه على الانترنيت ومحركات البحث فما هي الطريقة ؟؟

وماهي قيمة الاشتراكات السنوية التي يمكن ان يدفعها صاحب المنتدى للشركات المسؤلة عن النشر ؟؟

في البداية تأكد إنك لا تحتاج أن تدفع فلسا واحدا لغرض نشر موقعك .. إلا إذا أردت اتباع طريق الاعلانات .. أما إذا كنت تفضل نشر المنتدى عن طريق محركات البحث في مثل Google و Yahoo .. فإليك الطرق



الطريقة الأولى:

النشر عبراضافة الموقع إلى Google و Yahoo و Bing.. تروح لهذا الرابط بكوكل



http://www.google.com/addurl/?continue=/addurl



و تضيف بحقل الـ URL الرابط الرئيسي مال الموقع .. و تضيف بحقل الـ comment الوصف مالتك للموقع.. و تكتب صورة التحقق .. و راح ينضاف بفترة يومين او ثلاثة



و تروح لهذا الرابط بموقع بنغ

http://www.bing.com/webmaster/SubmitSitePage.aspx

و ايضا تضيف الرابط مال الموقع الجديد (وية صورة التحقق البشري)

و تروح لهذا الرابط بـ ياهو .. و تضيف رابط الموقع

http://siteexplorer.search.yahoo.com/submit

خللي ببالك .. انه تضيف فقط الرابط الرئيسي .. اللي يحتوي على الصفحة الرئيسية لموقعك .. و اللي منها راح تتفرع الروابط لباقي صفحات موقعك .. و هذه عملية تحتاج تسويها مرة واحدة بتاريخ الموقع (مجرد ما تنضاف الصفحة الرئيسية بمحركات البحث ..بعدها هي محركات البحث ترجعلها بصورة الية)


الطريقة الثانية:


إذا عندك منتدى أو اي موقع (موجود بكوكل اصلا) .. تكدر تضيف الرابط مال الموقع بحيث يصير قابل للضغط عليه بالفوتر مال المنتدى أو الموقع .. مثل الروابط اللي احنه خالليها جوة بالفوتر مال منتدانا .. و هذه جدا سريعة عادة



الطريقة الثالثة:



إذا انته تشارك باي منتدى .. .. تكدر تخللي الرابط مال الكروب بالتوقيع مالتك ايضا على شكل ارتباط تشعبي (يعني كلمة بيها رابط) قابل للضغط عليه ..



إذا المنتدى ما يسمح بهيجي شي .. او مانع الروابط اللي بالتواقيع عن الزوار .. تحاول تضيف الرابط بحقل (الصفحة الشخصية) بصفحة تعديل البيانات بالمنتدى .. و تتأكد أنه من تدخل زائر لذاك المنتدى .. تكدر تضغط على رابط الصفحة الشخصية للعضو داخل المواضيع .و تنتقل للموقع مالتك

الطريقة الثانية و الثالثة .. تعتمد أنه كوكل يسحب الصفحات و المشاركات بالمنتديات بشكل دوري .. و يشوف الرابط مالتك .. و يضيفه للبحث مالته

الطريقة الرابعة:

تستخدم ادلة المواقع العربية و الانكليزية .. مثل دليل العرب الشامل للمواقع العربية .. و دليل المواقع العراقية بموقع العراق .. و غيرها و غيرها .. موجودات كلش هواي .. بكل موقع تضيف رابط موقعك و اسمه .. و كل المعلومات اللي يريدها منك .. و تضغط على زر الاضافة و ينضاف بعد فترة عادة بذاك الدليل


طرق أخرى تجارية


طريق الاعلانات و يكون على ثلاثة انواع

1- الاعلانات بواسطة نظام Google adword .. و هذه تسوي حساب بكوكل اد وورد ... و تدفعلهم فلوس مقابل كل ضغطة على موقعك
2- الاعلانات بواسطة الاتفاق مع اصحاب المواقع و المنتديات مباشرة .. و هذه عادة تتم بمراسلة صاحب الموقع . علمود يخللي الاعلان مالتك بالهيدر مال الموقع مالته مقابل اشتراك شهري قيمته حسب نوع الموقع
3- التبادل الاعلاني .. و هو انه تتفق وية صاحب منتدى بحيث انته تخليله اعلان لمنتداه .. و هو يخللي اعلان لمنتداك .. و محد يدفع فلوس للاخ .. هذه إذا كان الموقعين بنفس المستوى من الشعبية

[ابو عبد الله العراقي]

بارك الله بيك وجزاك خير الجزاء ان شاء الله تعالى على هذا الشرح المهم والمفيد المبسط